Lasarus hlauparus...

Þar kom að því... í fyrsta skipti í vetur læt ég einhverja leiðinda kvefpest slá mig niður og hef því ekki hreyft mig í dag né í gær, fyrir utan 9holurnar sem ég fór á Víkurvelli í gærmorgun í góðra manna hópi. Finnst ég svona hálfpartinn vera að svíkjast undan, með því að vera ekki að fara eftir áætluninni, en það er væntanlega lítil skynsemi í því að brölta í æfingahlaup með hor í nös og þungt fyrir brjósti.

Febrúarmánuður mjakast áfram og ég er alveg í gírnum Finnst það sem ég er að gera þessa dagana rosalega gaman og æfingarnar skemmtilegar og spennandi og ég er bara ekki frá því að ég sé farin að finna mun á sjálfri mér síðan ég byrjaði að æfa eftir þessari æfingaáætlun fyrir maraþonið.

Janúarmánuður gekk ágætlega. Ég fór þó rólega af stað því ég var svolítið tæp í vinstra hnénu og með einhverja slæmsku neðarlega vinstra megin í bakinu. Ég ákvað svo frá 1. janúar að skrá alla mína hreyfingu þetta árið og halda utan um alla kílómetra sem ég fer.

Árið hófst á útihlaupi á golfvellinum á Nýársdag og fyrstu daga ársins var ég á eigin vegum og hljóp bara eftir mínu plani, ef svo má segja og gekk bara vel. 12. janúar fékk ég svo þrjár sprautur í bakið og hvíldi því þann dag og næsta og fór svo af stað aftur á fimmtudegi og tók þá létt skokk fimmtudag til sunnudags, stigvaxandi í tímalengd, 20-30-40 og 50mínútur og byrjaði svo skv. nýrri áætlun mánudaginn 18. janúar og er því búin að æfa skv. henni í fjórar vikur.

Vikan líður þannig að á mánudögum tek ég brekkuspretti, þriðjudagar og fimmtudagar eru eins en þá tek ég 5km í upphitun og svo lyftingar og 10mín labb á bretti í lokin, miðvikudagar eru fartlek dagar, föstudagar frí, laugardagar interval dagar og á sunnudögum tek ég langa hlaupið, sem er nú ekkert svo langt ennþá en það kemur.

Janúar taldi samtals 175,2km og fór ég mest 47,5km í síðustu viku mánaðarins en þetta er það lengsta sem ég hef hlaupið á einum mánuði hingað til. Febrúar er kominn í 80km slétta og riðlast nú væntanlega planið eitthvað út af þessu kvef-hléi mínu núna en það verður vonandi tími til að bæta það upp síðar...

Annars var janúar svolítið erfiður upp á það að gera að það var svo mikið að gera í skemmtanalífinu og það tekur vissulega toll af manni. Ég tók tvo fertugsafmæli með trompi, eina stelpuferð til Reykjavíkur og svo byrjaði ég febrúar á því að klára kröftugt djamm á þorrablóti, en það sér hver heil vita maður að það gengur ekki til lengdar að vera úti á lífinu helgi eftir helgi, þegar maður er að þjálfa á markvissan hátt og ætlar sér að ná einhverjum árangri. 

Ég hef því tekið þá ákvörðun að ég er komin í hlé frá meiriháttar skemmtanahaldi fram yfir hlaup. Auðvitað á maður eftir að skella sér á ball og í einhverja gleði en það verður væntanlega eitthvað annað í glasinu mínu þá en g&t ef þið skiljið hvað ég meina! Enda er vatnið hér í Hólminum eitt það besta sem þú færð á landinu og þó víðar væri leitað!

En nú ætla ég að fara og snýta mér og taka nap á þetta, hafa það huggó í kvöld og brölta svo vonandi spræk í vinnuna í fyrramálið

Heilsa í bili,

Íris

Ágætis start...

Þar kom að því! Er búin að velta fyrir mér í dálítinn tíma að stofna nýtt blogg, aðallega til að halda utan um þetta hlaupavesen mitt eftir nýjasta markmiðið sem búið er að setja.

Þetta byrjaði allt á sjávarútvegssýningunni í Brussel í apríl 2009. Við stelpurnar vorum á leið niður í sýningarhöll einhvern morguninn þegar ein úr vinnuhópnum kastaði því fram að það gæti orðið gaman að hlaupa maraþon fyrir næsta stórafmæli.

það var eins og við manninn mælt... við hinar gripum þetta á lofti! Nema hvað  ?!?

Við erum sem sagt sex konur sem vinnum hjá Marz Sjávarafurðum ehf., en fimm okkar hafa ákveðið að slá til með þessa áskorun. Þrjár ætla að fara heilt maraþon og tvær ætla að fara hálft maraþon. Allar erum við á mismunandi stöðum í lífinu, á mismunandi aldri og með misjafnan bakgrunn í þjálfun. Það kemur þó ekki í veg fyrir að við ákváðum að láta vaða eftir að hafa velt þessu fyrir okkur síðustu mánuði.

Því var það um áramótin um leið og skráning hófst að ég sat inni við borðstofuborðið með fartölvuna í fullu blasti og skráði og skráði hersinguna í 35. Amsterdam maraþonið sem fer fram þann 17. október 2010, á meðan fjölskyldan mín var úti að skjóta upp rakettum. Mér finnst hvort sem er ekki gaman að flugeldum...

Fyrsta skrefið var því tekið, formlegri skráningu lokið og nú skyldi byrja að telja niður.

Í rauninni var fyrsta skrefið samt stigið í haust þegar við ákváðum þetta formlega, fundum hlaup sem hentar hópnum og veltum fyrir okkur að leita ráða hjá okkur fróðara fólki. Við á skrifstofunni hér heima fáum handleiðslu, því hún Fríða Rún Þórðardóttir sér um þjálfunaráætlanir fyrir okkur, ráðleggur okkur með mataræði og heldur utan um okkur á þessari vegferð.

Þetta blogg hugsa ég sem nokkurs konar dagbók fyrir sálfa mig því ef ég klára þetta, þá lít ég á það sem eitt af því stærra sem ég hef gert í lífinu fram til þessa og mig langar að eiga það á "fæl" einhversstaðar.

Læt þetta nægja sem fyrstu færslu. Mun væntanlega fylgja henni eftir í vikunni með smá samantekt um janúarmánuð en þá hófust formlegar æfingar.

Sæl að sinni